САЙД С.ОДОНТУЯА ГОРХИ-ТЭРЭЛЖИЙН БАЙГАЛИЙН ЦОГЦОЛБОРТ ГАЗРЫН ХАМГААЛАЛТЫН ЗАХИРГААНД АЖИЛЛАЛАА /2025-03-30/
2025 оны 04 сарын 01
Байгаль орчин, уур амьсгалын өөрчлөлтийн сайд С.Одонтуяа, Тусгай хамгаалалттай газрын дарга Д.Батцогт болон яамны газар хэлтсийн удирдлагуудын хамт Горхи-Тэрэлжийн байгалийн цогцолборт газрын хамгаалалтын захиргаанд ажиллаж, байгаль хамгааллын бодит нөхцөл байдал, тулгамдсан асуудлуудыг хэлэлцэж, цаашдын бодлого, чиглэлийн талаар нээлттэй ярилцлаа.
Горхи-Тэрэлжийн байгалийн цогцолборт газар нь байгалийн өвөрмөц тогтоц, биологийн олон янз байдал, үзэсгэлэнт байгалиараа дотоод, гадаадын жуулчдыг ихээр татдаг. Жил бүр 600,000 орчим жуулчин зорин зочдог, гурван аяллын маршрут, 240 гаруй аялал жуулчлалын бааз үйл ажиллагаа явуулдаг байна. Тус хамгаалалтын захиргаа 24 ажилтантайгаар байгаль хамгааллын бодлогыг хэрэгжүүлэн ажиллаж байна.
Уулзалтын үеэр тусгай хамгаалалттай газар нутгийн тулгамдсан асуудлууд болох хашааны стандарт, жорлонгийн шийдэл, хог хаягдлын менежмент, цахим хяналт, байгаль хамгаалагчдын ажиллах орчин, нөхцөл зэрэг олон асуудлуудыг онцолж, цаашдын шийдэл, бодлогын чиглэл, шинэчлэлийн асуудлууд яригдлаа.
Түүнчлэн модон хашааг халж, олон улсын стандартад нийцсэн, байгальд ээлтэй хашаажуулалтыг хийх, амралтын газруудын нүхэн жорлонг орчин үеийн био технологийн шийдэл бүхий үнэргүй, эко шийдлээр солих, цахим пост ашиглан автомашины улсын дугаараар бүртгэл хийх цахим систем нэвтрүүлж оочер, дараалалыг багасгах зэрэг санал, шийдлүүдийн талаар санал солилцов. Байгаль хамгаалалтын үйл ажиллагааг үр дүнтэй болгохын тулд камерын хяналтын системийг өргөтгөх, хог хаягдлыг ангилан ялгах сэткэн уут олгох, байгаль хамгаалагчдыг орчин үеийн байр, техник хэрэгслээр хангах, сургалт, урамшуулалд хамруулах, жуулчдын ачаалалтай бүсүүдэд эко тэмдэглэгээ бүхий амралтын цэг, майхантай аялал буюу отоглох цэгийг олноор бий болгон хөгжүүлэх, алхалтын маршрут гаргах зэрэг чиглэлээр тодорхой үүрэг өглөө.
БОУАӨ-ийн сайд С.Одонтуяа, Газрын хууль бус олголт, интернетээр газар арилжаалах зэрэг зөрчлийг таслан зогсоох, орон нутгийн захиргаатай хамтран ажиллах шаардлагатайг анхааруулж, Горхи-Тэрэлжийн байгалийн цогцолборт газрыг олон улсын жишигт нийцэхүйц байгальд сөрөг нөлөөгүй аялал жуулчлалыг хөгжүүлэх замаар улсын төсвөөс татаас авалгүй өөрөө өөрийгөө санхүүжүүлэх алхмуудыг үе шаттайгаар зохион байгуулах ажлыг эхлүүлэх нь зүйтэйг онцоллоо.
Мөн Байгаль орчин, уур амьсгалын яам энэ оны тавдугаар сард “Тусгай хамгаалалттай газар нутгийн тухай хуулийн шинэчилсэн найруулга”-ыг Улсын Их Хуралд өргөн барихаар ажиллаж буйг танилцуулсан юм.
Байгаль хамгаалагчдын зүгээс ажиллах нөхцөл, нийгмийн баталгаа, байгаль хамгаалагчдын байр, техник хэрэгсэл хуучирч, стандарт хангахгүй болсон талаар санал, хүсэлтүүдийг дэвшүүлсэн бөгөөд салбарын сайдын зүгээс капсул хэлбэрийн дулаан байр, нарны зайн эх үүсвэр бүхий камерын хяналттай иж бүрэн шийдэл бүхий байшингийн санал боловсруулах чиглэл өгч, мотоцикл, шинэ автомашинаар хангах асуудлыг судлахаа илэрхийлэв.
Мөн олон жил ажилласан хамгаалагчдыг дэмжих зорилгоор гадаад, дотоодын сургалтад хамруулах, урамшуулал олгох, байрны ипотекийн зээлд хамруулах асуудлыг судлахыг холбогдох газар, хэлтсийн дарга нарт үүрэг болголоо.
2025 оныг “Байгаль орчны салбарын ажилчдын нийгмийн асуудлыг шийдвэрлэх жил” болгон зарласнаа онцлон дээрх асуудлыг шийдвэрлэж, ажиллах боломж нахцөлөөр ханган, дэмжлэг үзүүлнэ гэв. Мөн сайн дурын идэвхтэн хамгаалагчдыг байгаль хамгаалалд оролцуулах, үнэмлэхжүүлж, зөрчлийг мэдээллэх технологийн шийдлийг хөгжүүлэхийг үүрэг болгов.
© 2017 Тусгай хамгаалалттай газар нутгийн сүлжээ