Хан Хэнтийн тусгай хамгаалалттай газар, түүний орчны бүсийн ойн сан нь Төв Азийн эрс тэс уур амьсгалтай нөхцөлд зохицон ургадаг учир байгалийн жамаар нөхөн сэргэх чадавхаар нэн хязгаарлагдмал, түймэр, хөнөөлт шавьж болон хүний үйл ажиллагааны сөрөг нөлөөлөлд хялбархан ордог уулын ой юм. Хан Хэнтийн ой нь гол мөрний усны нөөцийг зохицуулах, хөрсийг элэгдэл эвдрэлээс хамгаалах, уур амьсгалыг зөөлрүүлэх, амьтан, ургамал, бичил биетний амьдрах тааламжтай орчныг бүрдүүлэх, мөнх цэвдгийг тогтоон барих зэрэг экологийн өндөр ач холбогдолтой юм. 

Ойн сангийн нийт талбай нь 553170 га, түүний орчны бүсийн ойн сангийн талбай нь 801451 га гэж тогтоосон байна. Хан Хэнтийн ДЦГ-ын ойн сангийн 96,8 хувийг шилмүүст, 3.2 хувийг навчит, орчны бүсийн ойн сангийн 92.3 хувийг шилмүүст, 7.7 хувийг навчит мод тус тус эзэлж байна.

Ойн сангийн талбайн 30.1 мянган га нь шатсан ой, 10.2 мянган га нь огтолсон талбай, 41.8 мянган га нь тармаг ой, 11.4 мянган га нь ойжих талбай эзэлж байна. Ойн сангийн нийт нөөц 124612.6 мян. шоо метр, бөгөөд модны төрөл бүрээр авч үзвэл: шинэс 64562.7 шоо метр, нарс 11035.3 мян. шоо метр, хуш 42120.3 мян. шоо метр, гацуур, жодоо 969.5 мян. шоо метр, хус 5195.9 мян. шоо метр, улиас, улиангар 691.9 мян. шоо метр, бургас 46.1 мян. шоо метр  нөөцтэй байна. Нийт ойн талбайн 60,8 хувь буюу 482,4 мян.га шоо метр талбай нь  хөгшин ойд хамрагдана.