Хурх-Хүйтэний хөндий байгалийн нөөц газар нь Хэнтий аймгийн Иргэдийн Төлөөлөгчдийн хурал (ИТХ)-ын 2016 оны 5 дугаар сарын 2-ны өдрийн хуралдаанаар Хэнтий аймгийн Өмнөдэлгэр, Батширээт, Биндэр Баян-Адрага сумдын нутгийг дамнасан Хурх, Хүйтэний хөндий орчмын нутгийн 202,940,083 га талбайг орон нутгийн хамгаалалтад авсан байдаг. 2020 оны 5 сарын 20-ны өдрийн УИХ-ын 46-р тогтоолоор Хурх, Хүйтэний голын хөндий орчмын газрыг “Байгалийн нөөц газар”-ын ангиллаар улсын тусгай хамгаалалтад авсан.

           Олон зүйл усны шувуудын өндөглөн үржих нүүдлийн үедээ түр буудаллах чухал ач холбогдлыг нь харгалзан Хурх, Хүйтэний голын хөндий орчмын нуурууд бүхий 42,940 га газар нутгийг олон улсын ач холбогдол бүхий ус, намгархаг газар, усны шувууд олноор амьдардаг орчны тухай буюу Рамсарын конвенцид 2004 онд бүртгэн оруулсан байдаг. Энэ бүс нутаг нь Зүүн Ази-Австрали Азийн нүүдлийн шувуудын замын чухал хэсэг буюу Өмнөд Ази болон Австрали тивээс Сибирь рүү нүүдэллэж буй асар олон тооны нүүдлийн шувуудын замдаа буун амарч хооллодог стратегийн чухал бүс нутаг юм. Энэ утгаараа олон улсын хувьд чухал ач холбогдолтой газар юм.

          Тус БНГ-ын хамгааллын менежментийг БОАЖЯ-ны Тусгай хамгаалалттай бүс нутгийн удирдлагын газар, Хэнтий аймгийн БОАЖГ, Хэнтийн аймгийн засаг дарга, Өмнөдэлгэр, Батширээт, Биндэр, Баян-Адарга сумын засаг дарга нартай 2022 оны 10-р сарын 22-нд байгуулсан гэрээгээр Хурх-Хүйтэний БНГ-ын хамгаалалтын захиргааны үүргийг Зэрлэг амьтан судлах хамгаалах төв арван жилийн хугацаатай хариуцан ажиллахаар тохиролцсон. Тус байгалийн нөөц газрын менежментийн үйл ажиллагааг эхлүүлэхээр хамгаалалтын захиргааг 2023 оны 3-р сарын 1-ний өдрөөс 10 хүний орон тоотой байгуулж, үйл ажиллагааг явуулж эхэлсэн билээ.